AKO AY MAPALAD

Ako Ay Mapalad

 _____________

Ako ay hinirang, pinili ng Ama

At Kanyang tinawag na maging lingkod N’ya;

Ngayo’y kaanib sa banal na Iglesia

Sa banal N’yang bayan ako ay kasama.

Sambahayan ng Diyos, iyan na ang turing

Mga manlalakbay tungo sa lupain;

Basta’t Kaniyang utos ay aking diringgin

Ang lahat ng ito’y aking tutuparin.

Ako ay mapalad, ‘yan ay aking batid

Pagpapala ng Diyos, aking makakamit;

Kahit may hirap, mga pagtitiis

Ang Kaniyang saklolo, tiyak na sasapit.

Ako’y panatag na sa buhay na simple

Basta’t ang Diyos ay kasamang parati;

Hindi malulungko’t at mananaghili

Pagka’t ako’y anak ng Diyos na mabuti.

Di mangingimbulo sa yumayaman

Kahit guminhawa ang kanilang buhay;

Kapag gumagawa ng kasamaan

Tiyak na hahantong sa kaparusahan.

Ako ay mayroon pang inaasahan

Bukod sa biyayang pangkasalukuyan;

Kapag winakasan itong sanlibutan

Aking kakamtin yaong kaligtasan-

At doon sa langit ay maninirahan

Sa piling ng Ama magpakailanman.

Ariel G. Alzula

Southville, Cavite

April 2013